Zittesje Revuu 2010 Kloostergeheime

De insjperaase veur de Zittesje Revuu 2010 is gehaold oet ‘t Zittesje “Kloosterkwartier”.

In 1910 ein klooster en 100 jaor laater in 2010, nao de verboeing, ein luxe hotel mit hoogsjtaonde horeca en versjillende leisure-voorzieningen. Ein geliekenis: ‘t “Kloosterkwartier” sjtóng en sjteit midde in de Zittesje saamelaeving.

De Zittesje Revuu 2010 is gesjreeve door Sjef Schurgers.  Sjef, van woo ‘t “Kloosterkwartier”?

Wie ich mit versjillende evenemènte in aanraking koum mit ‘t klooster kómplex, waat veur de verboewing door ós dèks gebroek woort es artiste óngerkómme, leip ich dèks allein door dit enorm geboew te fantaseiere. Es d’r ein geboew in Zitterd is waat toen, en nog ummer de auwdheid van Zitterd oet-aomp, dan is ‘t dit klooster kómplex.

Wo geit ‘t verhaol euver?

De revuu is opgeboewd oet versjillende scénes, ómdat d’r meer es ein verhaol oet ’t auwd Klooster kómplex te haole is. Zeeker es’te dich ein bietje in de historie van dit Klooster verdeips. Mix deeze waore historie  mit get fantasie en laot dao ‘t jaor 1910 euver sjiene. Dan höb’ste de revuu zo wie deeze veur de pauze is opgeboewd. Nao de pauze gaon veer 100 jaar wiejer in de tied en kómme veer oet in ‘t jaor 2010. Dit markante geboew, zo wie ‘t sjtrak oet kump te zeen, wurt dan sjteevig ónger de loep gehauwte. Doe houfs allein mer al aan ein hotel te dènke  en dit hotel vervolgens te plaatsje in dit klooster kómplex, dan kump de humor van allein baovedrieve. Dit klooster zörg d’r veur dat de revuu bol sjteit van de geheime, gein geweun geheime mer ……………………”Kloostergeheime”!

Wilt geer weite waat veur geheime?… Hauwt dan dees site in de gaate veur de sjtart van de kaartverkoup!